Bilan Jounen Dèy Nasyonal 31 Oktòb 2024

By : Brigad Chalmay Peralt/

Kominike pou laprès, 4 novanm 2024.

Brigad Chalmay Peralt voye yon gwo kout Ayibobo pou tout òganizasyon, enstitisyon, medya, pèsonalite ak tout moun nan popilasyon an ki te pote kole nan jounen dèy 31 oktòb la. Nan dat 21 oktòb ki sot pase a, plizyè òganizasyon nan 4 kwen peyi a ak nan dyaspora a te lanse yon jounen dèy nasyonal pou jedi 31 oktòb la. Brigad la te gen misyon pou kòdone jounen dèy la epi planifye yon kanpay kont pwodui dominiken yo nan peyi a.

Nan tout depatman nan peyi a, te gen plizyè aktivite ki te fèt pou make jounen dèy la. Pami yo te gen :

• Emisyon radyo, sitou nan radyo kominotè yo nan plizyè depatman

• Refleksyon sou vyolans / ensekirite gang pwograme yo

• Ekspozisyon tèks ak foto

• Depozisyon jèb flè nan memwa viktim yo plizyè kote nan peyi a

Pandan jounen dèy la, Brigad la te mete nimewo telefòn plizyè otorite nan leta a sou rezo yo pou popilasyon an te rele yo pou mande yo pran responsablite yo oubyen demisyone si yo pa kapab. Ann kontinye rele yo paske nou bouke anba ensekirite / kawo planifye aktè nan entènasyonal la ak aktè lokal ki osèvis yo tabli nan peyi a.

Apre jounen dèy sa a, travay Brigad la p ap kanpe la. N ap kontinye batay sou pwoblèm ensekirite / kawo pwograme a. Epi Brigad la ap prepare yon kanpay kont pwodui dominiken yo nan peyi a. Brigad la pral lanse kanpay sa a pou pèp Ayisyen an reyaji kont move tretman konpatriyòt nou yo ap sibi an dominikani. Yon lòt fwa ankò, Brigad Nasyonal Chalmay Peralt remèsye tout moun alawonnbadè ki te pote kole nan jounen dèy sa a.

Pou Brigad Nasyonal Chalmay Peralt :

Nicolas Pierre-Louis / (PRELA) / Latibonit

Nouvo Lib (LAKAY) / Latibonit

Guy Numa (MODEP) / lwès

Jean Jacques Henrilus / Konfederasyon Nasyonal Tèt Kole Ti Peyizan Ayisyen

Lesly Cacisse (KROS) / Sidès

Vilarson Bichara (KPAS) / Sid

Jean Herode Clermon / TK Sid

Blandine Signe / TK Grandans

Rony Luma / ASO Grandans

Exantus Exanté / ASO Nòdwès

Nernel David / TK Nòdwès

Daniel Sanon / KORENIP

Dieulange Ostavien / RASIN branch Nò

Marcquinson Jean (KRPN) / Nòdès

Césaire Jean Sneider / Radyo Rezistans

Pou otantifikasyon

Guy Numa

Jean Jacques Henrilus